धनुषा । धनुषामा कारले मोटरसाइललाई ठक्कर दिँदा पत्रकार शिवेन्द्र यादव रोहिताको मृत्यु भएको छ ।
शनिबार बिहान ३ बजेतिर जनकपुरधामको थापाचोकमा बा २१ च ३३४३ नम्बरको कारले रोहिता सवार प्रदेश-०२-ज ५६९४ नम्बरको मोटरसाइकललाई ठक्कर दिएको हो । कारको ठक्करबाट रोहिताको घटनास्थलमै मृत्यु भएको जिल्ला प्रहरी कार्यालय धनुषाका प्रहरी उपरीक्षक भूवनेश्वर तिवारीले जानकारी दिए ।
धनुषाको शहीदनगर नगरपालिका ८ का ३२ वर्षीया रोहिता जनकपुर राजधानी डटकम नामक अनलाइनमा कार्यरत थिए । रोहितासँगै मोटरसाइकलमा पछाडि सवार उनका साथी २५ वर्षीय जयनाथ यादव भने घाइते भएका छन् । उनको जनकपुरको सीता अस्पतालमा उपचार भइरहेको छ ।
कार र चालकलाई नियन्त्रणमा लिएर घटनाबारे थप अनुसन्धान सुरु गरिएको जिल्ला प्रहरी कार्यालय धनुषाले जनाएको छ ।
