काठमाडौं । नेकपा एकीकृत समाजवादीका सम्मानित नेता एवं पूर्वप्रधानमन्त्री झलनाथ खनालले गठबन्धन सरकारप्रति पार्टीको बृहत् असन्तुष्टि रहेको बताएका छन् । बुधबार झापामा आयोजित एक कार्यक्रममा उनले आफ्नो पार्टी सरकारमा निमित्तमा सहभागी बनेको जिकिर गरे ।
उनले देशले नयाँ कोर्षको माग गरिरहेको बताए । उनले देशका आमजनता र राष्ट्रका मागहरूलाई सम्बोधन गर्ने किसिमको नयाँ ढंगले सरकार आउनुपर्ने उल्लेख गरे । उनले सरकारले ल्याएको नीति तथा कार्यक्रम र बजेटले जनतालाई छुन नसकेको बताए ।
उनले मुलुकको अर्थतन्त्र संकटपूर्ण रहेको बताए । पूर्वप्रधानमन्त्री खनालले देशमा रोजगारी नहुँदा र देशको नेतृत्वप्रतिको अविश्वासका कारण युवाहरू विदेश पलायन भइरहेको बताए ।
