काठमाडौं । सहकारीका बचतकर्ताको अर्बभन्दा रकम ठगेर फरार भएका गितेन्द्रबाबु राई (जीबी) राईको राहदानी रद्द नहुने भएको छ । काठमाडौंको स्वर्णलक्ष्मी, पोखराको सूर्यदर्शन, रुपन्देहीको सुप्रिमलगायतका सहकारीका बचतकर्ताको रकम हिनामिना गरी फरार भएका ग्यालेक्सी टेलिभिजनका सञ्चालक राई मलेसियामा रहेको प्रहरीको अनुमान छ ।
नेपाल ल्याउने प्रयास स्वरुप कास्की प्रहरीले राईको राहदानी रद्द गर्न भन्दै राहदानी विभागलाई पत्र लेखेको थियो । तर, विभागले उनको राहदानी रद्द गर्नुपर्ने आधार नदेखिएको जवाफ पठाएको छ ।
राहदानी रद्द नहुने भएपछि उनलाई मलेसियाबाट नेपाल ल्याउन कठिनाइ हुने देखिएको छ । राईका पूर्व व्यावसायिक साझेदार रवि लामिछाने अहिले उपप्रधानमन्त्री तथा गृहमन्त्री छन् । लामिछाने पनि राईसँगै सहकारी ठगीमा मुछिएका छन् । गृहमन्त्री बनेपछि राईलाई जसरी पनि नेपाल ल्याउने बताएका लामिछानेले राईले गरेको फोहोर आफूले सफा गर्नुपर्छ भन्ने नरहेको दलिल पनि दिँदै आएका छन् ।
