काठमाडौं । नेपाली कांग्रेसका नेता डा. शशांक कोइरालाले आगामी दिनमा नेपालले महिला प्रधानमन्त्री पाउनेमा निश्चिन्त हुन आग्रह गरेका छन् ।बुधबार काठमाडौंको धापासीमा नेपाल महिला संघ केन्द्रीय कार्यालयका लागि नयाँ भवन निर्माणको शिलान्यास कार्यक्रमलाई सम्बोधन गर्दै पूर्वमहामन्त्री कोइरालाले आफूले नेपालमा महिला प्रधानमन्त्री बनेको हेर्न चाहेको बताएका हुन् । उनले महिलाहरूमा समाजलाई डोर्याउन सक्ने क्षमता हुने बताए । उनले महिलाहरूलाई हरेक कुरामा अघि सार्न जरुरी रहेको बताए ।
नेता कोइरालाले आफूले अहिलेसम्म चार पटक निर्वाचन जितेको र त्यो सबै महिलाहरूको साथ र सहयोगकै कारण जितेको बताए । उनले महिलालाई हरेक क्षेत्रमा ५० प्रतिशत अधिकार दिनुपर्ने बताए । कोइरालाले महिलाहरूलाई देशको नेतृत्व गर्न सक्ने गरी सक्षम बन्न आग्रह गरे ।
