काठमाडौं । अर्घाखाँची जिल्ला मालारानि गाउँपालिका ५ बागीमा रहेको श्री शान्ति माध्यमिक विद्यालयले हीरक महोत्सव आयोजना गर्ने भएको छ । बुद्धजयन्तीको अवसरमा शान्ति माविले हीरक महोत्सव मनाउने तयारी थालेको हो। यसै तयारीको सिलसिलामा शनिबार काठमाडौंको महेन्द्ररत्न क्याम्पस, ताहाचलमा सरोकारवालाबीच अन्तर्क्रिया कार्यक्रम भएको छ।
कार्यक्रममा सहभागी सबैले विश्वशान्तिका अग्रदूत गौतम बुद्धको जयन्तीको अवसरमा हुन लागेको हीरक महोत्सवलाई ऐतिहासिक र भव्य बनाउनुपर्नेमा जोड दिए। अन्तर्क्रिया कार्यक्रममा माओवादी केन्द्र सचिव एवं पूर्वसांसद डिलाराम आचार्य, निवर्तमान राज्यमन्त्री सुशिला सिर्पाली ठकुरी, संघीय सांसद बिजुला रायमाझी र शिक्षाप्रेमी नरेन्द्रकुमार क्षेत्रीलगायतले मन्तव्य राखेका थिए।
कार्यक्रम व्यवस्थापन समितिका सदस्य एंव वडाध्यक्ष तुल्सिराम मिश्रको अध्यक्षता, मोहनकुमार महतको सञ्चालन र स्वागत मन्तव्य सम्बन्ध समाज काठमाडौँका अध्यक्ष माधव प्रसाद भुसालले गरेका थिए । कार्यक्रमको उद्देश्य एवम् विद्यालय समग्र पक्षको प्रस्तुतीकरण प्र.अ.मानबहादुर पाण्डेले गरेका थिए ।
पूर्ववडाध्यक्ष एवं आर्थिक समितिका सदस्य शोभाकर भुसाल, ज्ञानु अधिकारी, विष्णु चौहान, बिबि अधिकारी, महेन्द्र बस्नेत, विमल चौहान, अम्मर कुमार बि क, गङ्गा बहादुर पन्थी, साबित्रा शर्मा भुसाल, पुष्कर खड्का लगायतले समेत आफ्नो मन्तव्य राखेका थिए।
हीरक महोत्सव भव्य रूपमा सम्पन्न गर्न सबै आ–आफ्नो ठाउँबाट सहयोग गर्ने वक्ता र सहभागीको प्रतिबद्धता थियो। कार्यक्रममा पूर्वविद्यार्थीलगायत शिक्षासँग सरोकार राख्ने विभिन्न पेसा–व्यवसाय गर्ने व्यक्तिहरू सहभागी थिए । शान्ति मावि बुद्धजयन्ती अर्थात् ३ वैशाख ०१९ मा स्थापना भएको थियो।
सुरुमा प्रावि तह रहेको यस माविमा हाल उच्च माध्यमिक तहसम्मको पठनपाठन हुँदे आएको छ । यसबाहेक ०७६ देखि कम्प्युटर इन्जिनियरिङ कोर्स पनि सञ्चालनमा छ। विद्यालयमा विभिन्न नामका छात्रवृत्ति अक्षय कोष स्थापना गरिएका छन्।
हरिक महोत्सवको तयारी स्वरुप शान्ती मावीले केही दिन अघि अर्घाखाँचीको सन्धीखर्क,रुपन्देहीको बुटवलमा समेत अन्तक्रिया कार्यक्रम गरेको थियो । प्रअ मानबहादुर पाण्डेका अनुसार महोत्सवका लागि करिब ४० लाख खर्च हुने अनुमान छ।
