बुटवल । गएरातिदेखि परेको भारी वर्षाका कारण बुटवलका विभिन्न क्षेत्र डुवानमा परेका छन् । भारी वर्षाका कारण अमरपथ क्षेत्र जलमग्न भएको छ भने केही घर तथा बस्तीहरुमा पानी पसेको छ । वर्षाले डुवान भएपछि केही विद्यालयहरु समेत प्रभावित भएका छन् । न्यू होराइजन इंलिश बोर्डिङ स्कुलले आज बिदा दिएको छ ।
त्यसैगरी राससको प्रदेश कार्यालय, रुपन्देही उद्योग संघको कार्यालय, पश्चिम नेपाल बस समितिको कार्यालय सबै डुबानमा परेका छन् ।
बुटवल उपमहानगरका मेयर खेलराज पाण्डेले फूलबारी क्षेत्र, रासस कार्यालय वरिपरी र न्यू होराइजन स्कुल क्षेत्रमा रातीदेखि परेको ठूलो पानीका कारण डुबानमा परेको जानकारी दिए । हिलो र नालीको फोहोरले बजार दुर्गन्धित भएको छ । जताततै हिलाम्य हुँदा हिंड्डुल गर्नसमेत मुस्किल भएको छ ।
मेयर पाण्डेले नाली र कुलो थुनिंदा डुबानको समस्या आएको बताए । उनका अनुसार अहिले उपमहानगरको टोली सरसफाईमा जुटेको छ ।
रुपन्देही उद्योग संघको कार्यालयको तल्लो तलामा पूरै लेदोले भरिएर पस्न नमिल्ने भएको छ भने राससको कार्यालय पानीले पूरै जलमग्न रहेको छ ।
