काठमाडौं । कांग्रेस सभापति शेरबहादुर देउवाले केपी शर्मा ओली नेतृत्वको सरकारमा घरबाट मन्त्री पठाएका छन् । उनले कांग्रेस केन्द्रीय सदस्यसमेत रहेकी श्रीमती आरजु राणा देउवालाई परराष्ट्रमन्त्री बनाएका हुन् ।
देउवाले कांग्रेसको भागमा परेका १० मन्त्रीमध्येमा संस्थापन समूहमा छवटा मन्त्रालय राखेका छन् भने इतर समूहलाई चारवटा मन्त्रालय दिएका छन् । चारवटामा राष्ट्रपति रामचन्द्र पौडेलको कोटासमेत समावेश गरिएको चर्चा कांग्रेस वृत्तमा छ ।
कांग्रेसको तर्फबाट नेतृत्व गरेर सरकारमा गएका उपप्रधानमन्त्री तथा शहरी विकासमन्त्री प्रकाशमान सिंहलाई १४औँ महाधिवेशनमा सभापतिमा सघाएको गुनसमेत देउवाले तिरेका छन् । संस्थापन समूहबाट रमेश लेखक–गृह, आरजु राणा–परराष्ट्र, दीपक खड्का–ऊर्जा, ऐनबहादुर शाही– वन, अजय चौरसिया– कानुनमन्त्री बनेका छन् ।
त्यस्तै, तेजुलाल चौधरी– युवा खेलकुद बनेका छन् भने उनी राष्ट्रपतिनिकट रहेको चर्चा छ । संस्थापनइतर समूहबाट बद्री पाण्डे –पर्यटन, प्रदीप पौड्याल– स्वास्थ र रामनाथ अधिकारी– कृषिमन्त्री बनेका छन् ।
