काठमाडौं । नेपाली कांग्रेसका नेता शंकर भण्डारीले काठमाडौं महानगरपालिकाका मेयर बालेन्द्र शाह (बालेन) बारेका प्रधानमन्त्रीका अभिव्यक्ति नियन्त्रणको माग गरेका छन् ।
प्रधानमन्त्री राष्ट्रकै अभिभावक भएको ध्यानाकर्षण गराउँदै भण्डारीले प्रधानमन्त्रीजस्तो व्यक्ति एउटा व्यक्ति वा संस्थाविरुद्ध उभिन नहुने बताएका छन् । “काठमाडौं महानगरका मेयरलाई जनताले निर्वाचित गरेका हुन्, महानगरलाई व्यवस्थित बनाउनका लागि उनी क्रियाशील नै देखिन्छन्,” भण्डारीले भनेका छन्, “केही समस्या भए प्रधानमन्त्रीले अभिभावकत्व लिने, बोलाएर छलफल गर्ने हो, हुर्मत लिने तथा आलोचना गर्न सिंगो पार्टी पंक्तिलाई निर्देशन दिने विषय सुहाउँदो लागेन ।”
भण्डारीले देशको एक जिम्मेवार नेता र प्रधानमन्त्री पदमा आसीन व्यक्ति भएकाले उनले राष्ट्रिय हितका विषयमा पार्टी स्वार्थभन्दा माथि उठ्नुपर्ने उल्लेख गरेका छन् । उनले प्रधानमन्त्रीका अन्य अभिव्यक्ति पनि लगाम जरुरी देखिएको बताएका छन् ।
सत्तासाझेदार दलका नेता भण्डारीले ‘मुलुकमा संयमताको खाँचो’ भन्दै विज्ञप्ति जारी गरेका भण्डारीले अहिलेका अभिव्यक्तिले प्रधानमन्त्री पदको शोभा नदिने उल्लेख गरेका छन् । “नेकपा एमालेका अध्यक्ष एवम् सम्माननीय प्रधानमन्त्रीज्यू मुलुकको महत्त्वपूर्ण राजनीतिक दलको प्रमुख हो भने मुलुकको प्रधानमन्त्री पनि हो । उहाँबाट सभ्य, सुसंस्कृत र परिपक्क व्यवहार तथा बोलीको अपेक्षा हुन्छ,” भण्डारीले भनेका छन्, “पार्टी अध्यक्षको हैसियतले उहाँले पार्टी नेताहरूलाई विपक्षीका विरुद्धमा आक्रामक ढंगबाट प्रस्तुत हुन दिएको निर्देशनलाई आमनागरिकले सकारात्मक रूपमा लिएका छैनन् ।”
उनले लेखेका छन्
मुलुकमा संयमताको खाँचो !
नेकपा एमालेका अध्यक्ष एवम् सम्माननीय प्रधानमन्त्रीज्यू मुलुकको महत्वपूर्ण राजनीतिक दलको प्रमुख हो भने मुलुकको प्रधानमन्त्री पनि हो । स्वभावतः वहाबाट सभ्य, सुसंस्कृत र परिपक्क व्यवहार तथा बोलीको अपेक्षा हुन्छ । वहाँका विचार, अभिव्यक्ति र व्यवहारले देशलाई निर्देशित गर्नुपर्दछ र आम नागरिकमा आशाको सञ्चार गराउने तथा आपसी सद्भाव बढाउन मद्धत गर्नु पर्दछ । तर केही समय देखि त्यस्तो अवस्था देखिएको छैन । पार्टी अध्यक्षको हैसियले वहाले पार्टी नेताहरुलाई विपक्षीका विरुद्धमा आक्रामक ढंगबाट प्रस्तुत हुन दिएको निर्देशनलाई आम नागरिकले सकारात्मक रुपमा लिएका छैनन् ।
त्यसका अतिरिक्त कुनै व्यक्ति विशेष तथा संस्था विशेष प्रति पनि वहाँका कडा र अस्वभाविक टिप्पणीहरु बाहिर आएका छन् । जस्तै काठमाडौं महानगरपालिकाका मेयर बालेन्द्र शाहप्रति लक्षित तिखा टिप्पणीहरु चर्चामा छन् । काठमाडौ महानगरका मेयरलाई जनताले निर्वाचित गरेका हुन्, काठमाडौं महानगरलाई व्यवस्थित बनाउनका लागि उनि क्रियाशिल नै देखिन्छन् । केही समस्या भए प्रधानमन्त्रीले अभिभावकत्व लिने, बोलाएर छलफल गर्ने हो, हुर्मत लिने तथा आलोचना गर्न सिंगो पार्टीपतिंलाई निर्देशन दिने विषय त्यती सुहाउदो लागेन । देशको एक जिम्मेवार नेता एवम् प्रधानमन्त्रीको पदमा आसीन व्यक्ति भएकाले वहाँ राष्ट्रिय हितका विषयमा पार्टीगत स्वार्थभन्दा माथि उठ्न राम्रो हुने व्यहोरा सविनय अनुरोध गर्दछु ।
