काठमाडौं । उपप्रधानमन्त्री तथा गृहमन्त्री रवि लामिछानेमाथि सहकारी प्रकरणमा बन्ने संसदीय समितिको कार्यदेश टुंगो लगाउन बनेको कार्यदलको बैठक निष्कर्षविहीन भएको छ । सिंहदरबारस्थित कानुन मन्त्रालयमा करिब दुई घण्टा बसेको कार्यदलको बैठक निष्कर्षविहीन बनेको हो ।
तर सत्ता पक्षका कार्यदल सदस्य एमाले प्रमुख सचेतक महेश बर्तौलाले सहमति नजिक पुगेको दाबी गरे । उनले भने, ‘आज करिब करिब नजिक पुगेका छौ । ठ्याक्कै भोलि बिहान ८ बजे टुंग्याउछौँ । रवि लामिछानेको नाममा आज लचक हुनुभएको छ । संस्थाको नाम राख्नेमा असहज भएन । नाम राख्न हाम्रो असहमति छ आज त्यसमा लचकता भएको पायौँ । भोलि कार्यदलको अन्तिम बैठक राखेर ११ बजे संसद खुल्छ भन्नेमा आशाबादी छौँ ।’
तर कांग्रेसका कार्यदल सदस्य जीवन परियारले भने कुनै सहमति नभएको बताए । उनले भने, ‘आज पनि प्रगति भएको छैन । सरकारले समाधान चाहेको हो कि होइन भन्ने शंका उब्जिएको छ ।’
सत्ता पक्षले संसदीय समितिको कार्यदेशमा व्यक्ति नाम किटान नगर्ने अडान लिँदै आएको छ भने कांग्रेसले लामिछानेको नाम र उनी जोडिएको सहकारीको नाम उल्लेख गर्नुपर्ने अडान राखेको छ । दुवै पक्ष अडानमा टसमस नभएपछि सहमति जुट्न सकेको छैन ।
आज कार्यदेशमा सहमति जुटाई भोलि बस्ने प्रतिनिधिसभा बैठक सहज बनाउने दलहरूको तयारी छ । तर बिहीबारसम्म त्यस्तो प्रगति भइसकेको छैन । शुत्रबारका लागि बोलाइएको प्रतिनिधिसभा बैठकबाट नीति तथा कार्यक्रम पारित गर्ने सरकारको तयारी छ । तर, संसदीय समिति नबने कांग्रेसले संसद अवरोध जारी राख्ने बताएको छ ।
